絲絲講場：電車男專一 炒股唔輸蝕
呢排個市咁差，絲絲「坐」咗啲以為好穩陣嘅藍籌股，依家已經見紅，好傷心。尋日絲絲睇咗富達國際投資一份《男士財富管理研究報告》，即刻開心番，原來絲絲嘅表現都唔係好差。份報告揭示，多達七成「HEA男」輸錢，反而「電車男」嘅投資表現仲好得多。
七成港男損手賴個市
份報告訪問咗530個25至54歲嘅香港男士，超過三成嘅港男自認投資進取，但係多達七成以上，竟然將「損手」嘅責任推卸落投資市場環境，而唔係自己責任喎，賭仔真係姓「賴」！
絲絲當然知性格影響投資取向同成績，報告將受訪嘅港男分為八大類：住家男、享受生活型、HEA男、向錢看、野心型、事業型、社交型及電車男，但睇錢愈重嘅市儈男、同對自己投資「愛理不理」嘅HEA男，過去兩年嘅投資愈輸得多，多達七成HEA男輸錢！最意外就係，竟然連電車男的投資表現，都跑贏佢哋。
富達香港區機構業務主管陸劍平講，HEA男較少檢討投資組合，通常聽消息或道聽途說，屬於衝動派，所以咪蝕得甘囉！
至於電車男投資何解咁醒？申銀萬國證券聯席董事鄭家華就最了解，皆因喺佢嘅專欄，早就提過電車男炒股有兩度散手，佢同絲絲講，其實道理一字咁淺，關鍵係電車男夠「專注」。
鄭Sir仲話，話就話電車男多活喺自己嘅世界，但當佢哋將專注力用喺炒股上，專注、觀察入微，加埋心無旁騖地研究股份業績、股價走勢，投資成績勝過懶散同埋短炒嘅投資者一啲都唔出奇。
余絲韻