全球金融海嘯打咗咁多年，造成嘅災禍唔使金占士多講。喺○八、○九年，市場出現咗好多類似「字母湯」嘅金融名詞，考起唔少專家，今次由希臘引發嘅危機，都造就咗一堆新名詞，遲啲可能會列入各大字典嘅字庫入面。
依家最流行嘅，係花旗喺二月時，為希臘「脫歐」呢個情景，造咗個「Grexit」字出嚟，取材自「Greek euro exit」喎！花旗「Grexit」呢個詞彙一出，即刻喺坊間廣泛流傳，唔知德銀係咪唔想畀行家威晒，喺周一發表咗份報告，指希臘其實可以留喺歐元區，並同時使用一隻並行貨幣，避免突然轉換貨幣造成災難性後果，而呢個並行貨幣就叫做「Geuro」，呢個字連讀都難，嗰位德銀分析員就話係讀做「gh—euro」，老實講，金占士都發唔到呢個音喎。
見到「Geuro」呢個字，千祈唔好同「Neuro」同「Sudo」撈亂呀！呢兩個詞彙都係由一位巴克萊前高層喺一○年發明嘅，佢將歐元區解體時，北歐使用嘅歐元叫做「Neuro」，而南歐嘅就叫做「Sudo」。
仲未完啊！同希債危機有關嘅詞彙有「Eurogeddon」（歐元災劫）、荷蘭合作銀行作嘅「Grelection」（希臘選舉），仲有英國第四頻道一位經濟編輯作嘅「Drachmail」，取材自希臘舊有貨幣德拉克馬（Drachma），形容利用希臘脫歐嚟做談判籌碼喎。
金占士自問英文都唔差，但見到呢堆新字，就真係有啲頭痛喇。
金占士