財金達人：中證監主席助理邊個做？
內地幾個金融監管機構，過去半年人事調動幾乎冇停過，其中又以證券相關嘅機構調動最密集。中國證監會主席郭樹清上任半年，算係咁多個監管機構之中至為「活躍」。
證監同交易所系統嘅人事調動亦頻頻傳出唔同版本，除咗三月份有次涉及四十一個處級以上官員嘅職位大調整，近期證監主席助理朱從玖又被調咗去浙江做副省長。尋日市場仲傳出上交所總經理張育軍會去接朱從玖嘅位，可惜消息即時被上交所官員否認咗，郭主席助理嘅位到底花落誰家仍然未可以開古。
張育軍唔上京 留喺上海
講起朱從玖同張育軍，其實兩個人嘅背景真係好鬼似，大家唔單止喺有內地金融少林寺之稱嘅人行研究生部做過同學，而且仲先後都做過中證監辦公室副主任同上交所總經理嘅職務添，難怪傳聞一出，好多人都覺得可信性甚高。
之不過，市傳尋日會飛去北京上任新職嘅張育軍，呢幾日原來一路都留喺上海出席上海市第十次黨代會，尋日仲有上交所官員出嚟澄清，話佢喺黨代會分組會時，仲就住提升金融服務實體經濟嘅能力大提建議，令到傳聞不攻自破。睇怕中證監主席助理嘅位到底邊個坐，市場仲要估多一排喇。
金占士