絲絲講場：英印鈔廠等發脫歐財
喺希臘隨時脫離歐元區之際，絲絲赫然睇到英國《泰晤士報》一段新聞報道，話英國印鈔廠De La Rue正準備為希臘恢復採用舊有貨幣「德拉克馬」做好搶生意嘅準備。
為印希臘新鈔做好準備
聽聞De La Rue喺好耐好耐以前已銷毀晒用嚟印刷德拉克馬嘅器材，但該廠已命令員工選取保險絲，及攞番用嚟製造水印嘅銅模具，為印刷新鈔作準備。儘管依家準備工作仍係起步階段，但De La Rue只需六個月便可設計及印刷新鈔，並可能利用喺希臘鄰國馬耳他嘅廠房進行印製，以便火速運送新鈔往希臘。
絲絲心諗，希臘呢趟脫歐成真嘅話，咁呢間負責印刷英鎊及歐元紙幣嘅De La Rue，都可以話係少數政治動盪間接得益者，佢喺政權交替時生意特別多。之不過呢間廠因為前年印刷劣質鈔票畀印度財政部，搞到聲譽受損，所以話，今次佢哋如果能成功攞到希臘呢單生意，絕對唔止為利，實情係為咗名譽嘅翻身之作。