互聯網世界千變萬化，市場競爭激烈，大型網企都要時時變陣突圍。好似騰訊控股（00700）咁，尋日宣布架構重組，又將現任遊戲總裁任宇昕擢升為集團首席營運官。任宇昕連升幾級，進身為集團第三把交椅，好多人都認為騰訊係想加強有利可圖嘅網絡遊戲，以及繼續做大社交網絡業務。
任宇昕喺九八年畢業，取得電腦科學與工程專業，曾經喺華為技術工作。佢喺○○年加入騰訊，最初負責遊戲開發、運營、市場銷售等工作，其後因表現良好，職位三級跳，目前佢喺集團嘅排名僅次於主席馬化騰同埋總裁劉熾平，佢同時兼任互動娛樂事業群總裁，繼續開發佢嘅老本行網絡遊戲，以及帶領社交網絡事業群。
今次架構重組將現有嘅業務歸類去到6個事業群，除咗上述兩個事業群，餘下嘅仲有：企業發展、移動互聯網、網絡媒體、技術工程。當中企業發展事業群將直接向集團總辦公室匯報，其他事業群都由一位高級執行副總裁帶領。此外，騰訊控股又會成立全資子公司騰訊電商控股（簡稱ECC）去獨立營運電子商貿業務，實行喺網業多條戰線大作戰。
余絲韻