絲絲講場：劉永好乖女代父掃民行？
民生銀行（01988）一班主要股東，上個月討論過會唔會增持股份，揸住七個巴仙股份嘅劉永好話冇錢增持，其實佢謙啫！絲絲尋日見到一位名叫劉暢嘅人士，增持民行H股，劉永好個女都係叫劉暢，大有可能係同一人，絲絲心諗，就算你真係冇錢，阿女有呢！
劉暢近6億增持
據聯交所股權資料，劉暢喺上個月廿七日，即係民行公布今年首季業績嘅翌日，即刻入市增持7,839萬股民行H股，每股平均價7.6元，涉5.9577億元。
喺上個月中，成班股東「激辯」應唔應該增持股份，當然大家嘅主流意見係出咗首季業績至可以行動，終於民行嘅首季業績都不負眾望，錄得47%增幅，跑贏好多大行o架。
喺呢兩年搏命買民行股份嘅巨人集團老闆史玉柱，當時就話「只買不賣」，收埋啲貨壓喺櫳底，等第一季業績出爐之後就再增持。東方集團董事長張宏偉，都話考慮緊或者可能增持。劉永好笑住話史玉柱有錢，自嘲「我就冇錢」，明眼人都知佢點會冇錢吖。