近期港交所（00388）最惹矚目嘅動作，莫過於承認有意競購倫敦金屬交易所（LME）。身為行政總裁嘅李小加尋日出席一個午餐會做演講嘉賓，自然畀人追問，尤其係唔少分析員對呢單收購都「好有意見」，但李小加似乎胸有成竹，佢甚至用「下棋的人不評棋，但心中有數」，嚟形容收購LME是否一盤好棋，日後自有分曉。
好多分析員擔心港交所會「貴買」LME，之不過，有關呢單交易嘅資訊好缺乏，分析員都係根據僅有嘅資訊去做分析，李小加話港交所掌握好多資訊，其實分析員諗到嘅，港交所都已經諗過，佢話之所以競購LME，係為咗股東嘅利益着想。一句話講晒，就係港交所知道自己做緊咩！
如果單交易成事，就會係港交所上市以來最大嘅壯舉。有人問，呢個壯舉同主席周松崗新官上任有冇關係，李小加就打趣咁話，港交所乜都同主席有關係，亦都係乜都同佢李小加有關係！