六大證券會上個禮拜一連三天率團到新加坡交易所取經，今次其中一個「收穫」，係發現本地經紀同當地經紀「感同身受」，都活喺「同一天空下」！唔好笑絲絲突然變得感性，佢哋原來係講緊加時。話說當地經紀同佢哋一樣，因為午休時間而「叫苦連天」！
大家都知，新加坡比香港更「進取」，午飯時間已取消，即係全日「全天候」買賣。今次有份去當地考察嘅證券學會會長李細燕就話，當地經紀同佢哋講，取消午休對成交根本冇幫助，當地經紀都「敢怒不敢言」，經紀行老闆話取消午休後變相「拉長」午飯時間，因為要實施輪班制食飯，食飯時間由上午十一點至下午三點，每班一粒鐘，難怪老闆牙痛咁聲！
李細燕仲話，同當地一啲初入行者傾過，佢哋原本諗住呢行時間好，彈性高，結果齊齊「呻笨」！
不過，新加坡同香港最唔同嘅地方，係佢哋經紀行數目同香港差好遠，只有幾十間。訪問團今次仲參觀咗當地嘅「黑池」交易平台同高頻交易。
今次取經團陣容，除咗證券及期貨專業總會王國安冇去外，六大組織代表都有參與，包括李細燕、蔡思聰、馮煒能、閻峰、藺常念、同金利豐老闆娘朱李月華等都有隨團，成團人共有四、五十人。
余絲韻