Market Insight：醜股翻身 預埋聯通

最終聯儲局主席伯南克，僅維持超低息去到一四年底之承諾，QE是隻字不提。老實講，美國CPI由去年九月高位3.9%回落到今年三月2.7%，但依然比聯儲局目標通脹2%高，雖然伯南克前晚幾乎將通脹元兇歸咎於能源價格高企，認為影響短暫，不過，從QE1、2對油價的刺激作用，聯儲局實在無條件即時再出QE3，先決條件依然係股市投資氣氛差，失業率惡化及通脹大幅回落，欠一不成，估計年底總統大選前，通脹的年率比較基數高，例如到第三季，相信先有出手機會。

A股前景撲朔迷離

港股悶局彷彿沒完沒了，若非昨日尾市歐股高開，畀好友一展身手機會，全日恒指波幅可能剛剛過一百點。三點後挾淡倉帶動，恒指最後升163點收報20,809點，五月期指本來大部分時間呈150至170點低水，以反映藍籌除息影響，收市僅低水116點收20,693點，較理論除權價20,632點，實際倒過來高水61點，是否預示今日期指結算日好友大舉反攻？睇歐洲初段牛皮走勢又唔多似，目前成交奀成咁，期指即市走勢猶如鬼影變幻球，散戶務必要以較少張數控制可承受風險，否則好易畀人打完左邊面，打右邊。

今年中國貿易盈餘擴張幅度收窄，收支帳持續改善，外匯管理局有條件更快去審批QFII（合格境外投資者）的新客投資額度，四月再批出7億美元，總額達增至251.93億美元。A股前景撲朔迷離，人民幣升值預期又急降溫，同個基金界老友傾開，先知唔少大行本身QFII額度根本用唔晒，最直接影響係一啲曲線投資A股工具，好似安碩A50（02823）較指數溢價由二月高峰期13.5%，縮到尋日得3.6%（乃今年來最低），另一隻XDB滬深三百（03049）同樣由雙位數溢價，縮到昨日得番0.69%。早兩星期不少基金套戥活動，儲落唔少A50沽空盤，短期出現「平水」機會未可抹殺。A股死硬派粉絲，講唔埋有機會唔使溢價買到A50。

國壽20蚊邊買得過

比亞迪（01211）首季業績大跌九成，賺2,700萬元人民幣，股價昨急插5%報20.05元，睇佢159億元市值同盈利能力完全唔成正比，令人擔心有朝一日跌穿10元去番股神入貨水平。話說回頭，業績差股價跌本來天經地義，但業績唔好但股價倒升，這種醜女股便絕對有留意價值，或者股價已經一早反映業績不濟的問題。

有兩隻醜女股值得留意，中國人壽（02628）首季保費收入倒退7%，剛公布首季純利56.25億元人民幣，按年跌29.4%，按季則有2.49倍反彈，投資收益率2.71%，比上季3.51%差，業績中無詳細透露首季新業務價值預估，大行估計國壽表現依然較同業遜色，偏偏股價應跌唔跌，古勝相信兩個可能性，一是基金經理認定估值充分反映疲弱營運表現（過去四周，其全年業績預測被下調8.2億元至289億元人民幣），二是最壞時刻已過，餘下三季有迴旋之力。姑勿論點，古勝縱使較看好新華保險（01336），若非大市山泥傾瀉，20元左右國壽應該已跌夠。

唔再玩燒銀紙遊戲

另外一隻醜女股中國聯通（00762），去年底有唔少分析員擔心，千元手機補貼會無以為繼，3G上客會由快轉緩，其股價由去年底接近17元跌到早前最低12.6元，聯通首季營業額升24.8%至611.9億元人民幣，多得3G收入大升120%，純利增長5.9倍至10.1億元人民幣（稍低於預期10.5億至10.9億元），3G客戶按季升幅，由一一年第四季32.4%，回落至22.1%，但實話實說，唔搶客效果更佳，去年第四季因為千元智能手機客戶，唔少選用較低價套餐，加上補貼，結果季度業績見紅。

今年首季手機補貼減少至20億元，並取消智能手機46元人民幣的低價套餐，季度業績隨即由紅轉黑。該股昨抽升4%見13.54元，估計去年第四季，為達上客目標的燒銀紙遊戲告一段落，今年內地更多平價3G手機推出，修訂套餐計劃及減少補貼後，第二、三季應可休養生息搵真銀，重返15元樓上難度應該唔大。