內地金魚缸近幾個月好難搵食，唔少散戶情願暫時停吓手睇定個勢先，連啲專職做股民培訓嘅公司都受到波及。
最近市場就傳緊深圳一間號稱「中國最早最專業投資教育培訓機構之一」嘅股市培訓機構，因為連續虧損，終於頂唔住要解散員工，轉讓公司，近排更有學員開始上門追討學費，搞到連公安部門都有介入調查。
金魚缸難搵食，加埋中證監嚴查欺詐小散戶嘅所謂「民間股神」同「股市帶頭阿哥」，搞到早幾年大行其道嘅股市新手培訓機構日子好難過。最近出問題嘅呢間深圳公司，都曾經風光一時，培養過五千個專業炒家，主辦過嘅投資論壇連商品大王羅傑斯都出席過。
金占士聽聞，以前間公司嘅培訓師個個月都收入過十萬，可惜由舊年開始，全國各地嘅分公司就開始虧損，最後要被迫轉手同改名。最慘係有好多股市新手，原本仲諗住跟住間公司搵食，交咗幾萬蚊學費就咁冇咗，慶到要約埋一齊上門追討，連深圳警方都驚動埋，已經立案開始取證添。
金占士