市場擔心iPhone銷售增長放緩，一度令蘋果公司股價受壓，惟「蘋果概念股」仍受各國投資者追捧。內地股民唔係咁易買蘋果公司嘅股票，惟有轉移視線，專吼一啲獲蘋果公司寵幸，列入供應商名錄嘅公司，或者相關嘅QDII基金，一樣炒個不亦樂乎！
蘋果公司之前公布嘅156家供應商中，有喺內地股市掛牌買賣，就只有深圳A股安潔科技及比亞迪（01211）嘅A股。呢兩隻「正牌蘋果概念股」，股價由年初至今原來已分別升咗31%及29%，升幅雖及唔上蘋果公司年初至今所錄嘅41%升幅，不過同蘋果公司最主要嘅生產夥伴，海峽對岸鴻海科技年初至今累升27%相比，表現一點都唔輸蝕！
而蘋果公司股票佔基金比例高達兩成嘅QDII「國泰納斯達克100指數基金」，過去十二個月嘅漲幅為7.3%，走勢明顯跑贏上證綜合指數期內21%嘅跌幅。有證券行都好識得推介，搵咗多隻涉及iPhone相關零部件生產嘅股份，實行以「iPhone外圍供應商」概念大賣蘋果夢。