早前市場就傳聞話內地「果汁大哥」匯源果汁（01886）母公司想染指多一瓣，搞埋紅酒生意，但似乎市場就唔多「buy」，搞到嗰日上市公司股價大瀉。匯源董事長朱新禮終於開腔回應，話公司投資五億人仔只係用嚟種植葡萄，咁樣可以降低成本壓力，但係就冇諗過做埋紅酒業務喎。
事實上，匯源依家所需要嘅葡萄汁主要係喺外國進口，所以成本壓力比較大，而當吉林項目建成之後，有助匯源葡萄類果汁嘅生產成本下降，仲話有機會成為匯源新嘅利潤增長點。
匯源集團旗下有三大板塊業務，匯源果汁、匯源果業同埋匯源農業。有分析話，四年前，可口可樂全購匯源果汁得唔到批准，之後匯源果汁業務一直冇咩力上升，所以母公司惟有不斷加大其他板塊嘅投入。早排，匯源仲開始發展埋有機農業嘅業務添。