民企刮起嘅風暴，已經打咗好耐，每逢見到有上市公司董事跳船、核數師辭職、股東減持，都會當負面消息睇。尋日民企龍頭之一嘅玖龍紙業（02689），股權披露顯示The Northern Trust Company of Delaware同Zhang Xiujie呢兩個股東，持股量突然由超過六成降到零，你話唔驚就假嘅！
絲絲驚魂甫定，即刻打畀玖紙副總經理吳國勛（Benjamin），一輪嘴咁問佢係咪有基金股東睇淡，掟貨走人？係咪有人做咗場外活動？Benjamin叫絲絲鎮定啲，話純粹係家族基金安排變動啫。
Benjamin話Northern Trust其實係玖紙主席張茵家族成立嘅一個信託，佢嘅持股係幫張茵家族揸嘅，而Zhang Xiujie就係張茵家族入面嘅人，亦都係呢個信託嘅信託人，而佢哋嘅持股變零只係因為家族信託內部進行重組架構，而家族嘅總持股量並冇任何改變，亦都唔存在掟貨事件。