絲絲講場：港交所選主席 周松崗贏晒
港交所（00388）董事局喺尋日開董事會，周松崗喺「無驚無險」情況下，順利當上新一屆主席。
絲絲聽聞，一向力撐周松崗嘅夏佳理，提名周出任主席，由於董事會再冇其他主席提名，換言之，喺「無得揀」情況下，周當選主席係自然結果。最後周喺冇人反對下，通過成為新主席。
David Webb話好擔心
中環友話齋，政府既然已經「欽點」咗周松崗做港交所主席，呢個又擺明係「畀面派對」，班董事都好難「對着幹」，亦都唔想做「醜人」，所以呢個結果，大家都可以話一早就預期到。
雖然一班董事好識做，但市場人士依然唔多畀面。股壇長毛David Webb就話好擔心一旦遇上金融危機，周對交易及結算所嘅風險管理究竟知幾多？
自認缺證券業知識
周松崗尋日就話，自己對於市場集資同埋投資，有相當認識，但就承認，喺證券業方面嘅知識比較缺乏，佢會學習同聆聽唔同嘅意見。
佢上場後首要任務係先熟悉交易所工作，未來除咗會扎根香港外，亦都會繼續內地市場發展策略，同加強國際視野。佢仲話出任主席並唔屬於政府工作，他個人無經驗、無能力，亦都無興趣加入政府。
周松崗將獲取每年90萬元主席酬金，唔講唔知，佢原來係港交所小股東，持有15,000股，按尋日收市價計，都值191萬元㗎。
而啱啱卸任主席嘅夏佳理，就仍然「坐鎮」幾個舉足輕重嘅委員會，包括薪酬委員會及上市提名委員會等。
余詩韻