「神話幻滅」嘅思捷（00330）終於請到新任財務總裁喇！思捷尋晚發通告話，佢哋委任咗鄧永鏞為執董兼財務總裁，即將於五月二日生效，而周福安會喺五月中完成交接之後就「全身而退」。根據合約，新財務總裁將會有年薪800萬同花紅300萬，水平就同周福安差不多。
講番呢位新財務總裁，其實喺財會界有超過30年經驗。現年56歲嘅鄧永鏞，加入思捷前，由○三年十一月開始係信和置業（00083）、信和酒店（01221）同埋尖沙咀置業（00247）三間上市公司嘅首席財務總監，已經喺今年三月辭咗職。而之前係喺一間國際投資及財務諮詢服務機構擔任董事總經理嘅。
事實上，喺舊年九月，思捷決心要大規模改革，已經嚇一嚇市場。而且喺十二月初，周福安仲突然以唔想成日做「空中飛人」為由，即係經常穿梭德國同香港，辭去財務總裁職位。消息一出，市場信心又再動搖，驚管理層有「地震」，股價隨即大跌，所以大家都好關心思捷幾時先請到接任人。依家總算塵埃落定，至於新財務總裁嘅財技，可唔可以快啲令思捷成績表「變靚」，絲絲同大家惟有拭目以待喇！
余詩韻