Market Insight：統一企業有望復甦
中國首季GDP增長8.1%，昨公布三月外商直接投資（FDI）有晒麻麻哋嘅準備，結果再跌6.1%至117億美元，乃連續五個月按年下跌，憧憬人行四、五月繼續水浸股市的威力，被經濟過快減速的憂慮蓋過。滬綜指跌近1%報2,334點，指數一日唔升穿二月底高位2,478點，過去每次反彈浪頂一次低過一次的形態未變。
上個月滬深兩個市場合共5.75億股大小非解禁，減持規模更達10.73億股，創二十七個月嘅新高，按年與按月分別增加60%及3.9倍，如果信上市公司股東，比街外散戶睇得更清楚更遠，情況確係令人有啲不安。
昨日港股大部分時間陰陰乾，市場注視歐豬拍債，周末法國總統選舉，不明朗因素充斥，大孖沙選擇靠邊站。直到三點後歐股開高，好友慢慢收復失地，恒指由最多跌218點，收市跌48點報20,562點，可惜主板成交少得可憐，只得485億元，延長交易時段未見更多賭客，港交所（00388）又諗新招，有意競投倫敦金屬交易所（LME），圖拓大「賭場」版圖。
走勢上，恒指昨日低位20,392點，差32點就完全補返上周五20,360點留低的上升裂口，大市也重返10日線20,516點樓上收市，但較穩陣仲係等指數升穿上周高位20,816點，打破一浪低於一浪格局先有得傾。
收市後西班牙拍賣12及18個月國債，息率分別由三月對上一次拍債的1.418及1.711厘，升到2.623厘及3.11厘，借錢成本高咗，不過超額認購倍數亦都比上次高，去到2.9及3.77倍。
周四拍債至見真章
半杯水理論，話反應好又得，話成績唔好都得，查實歐洲債商，經長期再融資操作（LTRO）返咗三年平錢，泊落去12個月及18個月西班牙國債，根本係free rider，照睇聽日的三年及十年債拍賣，債商對西班牙財政有幾大信心先至係考驗，看官們要密切留意。
中央定下4%通脹目標，但大部分分析師都預測，樓價回落加上經濟放緩，全年通脹可能只有3至3.5%，部分得益於通脹紓緩的公司，像受惠木漿價格回落的兩間紙巾及紙尿片製造商，恒安國際（01044）及維達（03331），今年表現就鶴立雞群。
毛利率返合理水平
而副食品生產商統一企業（00220）及中國旺旺（00151）等也有類似情況，股市對於這類民生所需，預期受經濟放緩的影響，不及奢侈品消費，再者，原材料及包裝用塑膠價格回落，對於過去兩年飽受成本壓力的副食品股，業績可輕易有可觀的增長。
統一去年業績令人失望，賺3.12億元（人民幣‧下同），按年倒退四成，同○九年年賺7.04億元比較，盈利跌到高峰期一半都無。睇番兩年來，受原材料價格上漲拖累，統一毛利率由39.7%跌至29.2%，純利率更由7.73%，大幅收窄到1.83%，儘管銷售額幾乎翻一番，由91億元躍升至169億元，可借利錢太過微薄，去年即使方便麵及茶飲品有幾好賣，對業績而言也於事無補。
擴產進入高峰期，25至30%的營業額升幅，加上毛利率回歸到較合理水平，大行預測今明兩年賺6.27億及8.38億元，相當於100及33%增長，其實唔算太過進取，只係一三年預期市盈率19.8倍，或者復甦概念部分已預先透支，且資本需求高峰下，高盛估統一淨負債比率明年會升至74%，集資風險增加，捧場客或許可留有一手，等落實批股時再買多一注，平衡一下風險。
內地證券業待改革
海通證券（06837）昨日首天開始招股，但對現成的券商股中信証券（06030）不但沒有影子效應，其股價昨日更應聲跌4.7%，最後收報15.58港元。
古勝認為，目前內地證券行業發展遠遠落後於銀行業，長遠而言不平衡的情況必須予以糾正，相信未來內地金融改革將積極推進證券行業嘅發展，長遠而言，大型券商股確實有可為，但短期而言，宏調的影響仍然揮之不去，市場流通量只是針對性進行寬鬆，A股仍處於休養生息期，此刻股民若要投資券商股的話，要做好長期作戰的心理準備。
古勝