絲絲講場：中海搞繪畫賽展愛心
依家啲公司愈嚟愈重視企業社會責任（CSR），好似內地房地產發展商龍頭之一嘅中國海外（00688），喺○五年已經成立咗中國海外愛心基金會，以綠色環保、教育發展同慈善捐贈三個範疇作為重點，而近期中海就聯同以兒童共融為使命嘅慈善機構「親切」，搞咗個叫「友愛‧無疆界」嘅繪畫大賽，有近140間小學、特殊學校同單位參加。除本港小學生參加之外，仲包括由中海資助嘅五間內地希望小學同1間內地特殊學校，相當有意義。
不同文化共冶一爐
絲絲尋日亦去咗呢個繪畫大賽嘅頒獎典禮，呢次比賽吸引到超過6,700個，來自中港兩地嘅主流及特殊學校嘅小學生參加，分享佢哋心目中對友情同理想地球生活嘅睇法，而中海愛心基金會就根據作品數目，捐出善款，而今次就捐出咗三萬蚊喇。
絲絲聽老友講，中海同「親切」嘅合作已經連續第三年，畫畫比賽就第一次搞，今次呢300幾份得獎同入圍嘅作品，將會由即日起一連十三日展出，希望可以令大家都可以睇到，喺不同地方、種族同埋能力嘅小朋友，只要有一個平台，都可以展示共融同平等友愛嘅能量。