高盛被前員工離職時狠批罔顧客戶利益，十足十「吸血烏賊」，企業形象本來已經大打折扣。近排繼續是非纏身，畀人再爆出高盛進行名副其實嘅「不道德」投資。有專欄作家喺《紐約時報》踢爆高盛係一間私人媒體公司Village Voice Media（VVM）嘅股東之一，而間公司經營嘅竟然係美國最大未成年少女賣淫討論區。
據講，個網站係美國色情業嘅「龍頭」之一，色情廣告嘅市佔率高達70%，而且除咗未成年少女之外，部分女子更加係被逼良為娼嘅。高盛早喺○○年已經開始投資3,000萬美元喺VVM，但當時後者仲未收購個賣淫討論區，其後該筆投資被轉換為VVM16%股權。
呢單報道喺美國都引起幾大回響，高盛為保聲譽即時沽貨，試圖同「色情事業」盡快劃清界線。發言人喺星期日宣布，發現VVM嘅發展方向唔再符合高盛理念，而且無法控制其營運策略，所以旗下私募基金已經同意出售有關股權，但係講明「損失慘重」。