Market Insight：內銀估值偏低

昨日主板成交金額得455億元，反映投資者無心戀戰，恒指雖跌33點，但國指微升18點。期指成交唔夠5萬張，亦為一月五日以來最低紀錄，收市低水62點，後市都係十個牛皮九個淡，但到兩萬關相信會吸引股民撈貨。中國官方三月PMI出乎意料連升4個月，滙豐中國PMI終值亦向上修訂0.2個百分點，但市場似乎唔多受落，暫時冇乜方向。

業績期過後塵歸塵、土歸土，投資者本來應該做完檢討然後轉換組合，但只係得大跌股有人撈吓貨，新地（00016）再跌2.1%，但其他本地地產股已普遍回升，地產股不外乎計樓價走勢及資產折讓，所以唔少人認為其他的地產股只係無妄之災，可以趁低吸納，但上周末樓市成交大減，今年以來嘅「小陽春」或者已係強弩之末。

放大圖片

放大圖片

散戶愛股多有蟹貨

原本以為業績期過咗，個地雷陣應該可以較為安全，但昨日仍有中播（00471）同華保（00810）臨天光瀨尿延遲派成績表，民企股仍見宇陽（00117）、銀基集團（00886）、達進（00515）好幾隻流血不止，好在旭光（00067）同金石（01380）等翻生，尤其隻旭光，喺網上股票討論區熱烈到爆燈，可見「散戶愛股」零舍不同凡響，其實旭光喺買PPS業務時發大量新股並引入好多股東，風險的確特別大。

另一散戶愛股第一視頻（00082）早段亦有洗倉驚魂，開市頭半粒鐘曾急插一成幾，好在其後回穩，收市仍跌6.5%。能稱得上「散戶愛股」其實絕對唔值得恭喜，上升時蟹貨重重，下跌時互相踐踏。二月時4日內急升兩倍，為細價股揭竿起義嘅新時代能源（00166）不經不覺已打回原形，炒細價股最緊要識「快閃」。相反，穩陣派股票就創晒新高，例如恒安（01044）、維達（03331）、粵海投資（00270）、中食（00506）等。

負面因素大致反映

內銀股算係比較奇怪嘅板塊，估值堪稱全港最低，PE全部都係5至7倍，息率又高，但一律都升唔起，皆因驚住地方債務同樓市爆煲，二來驚抽水壓力，長線則有「利率市場化」呢個魔咒。內銀股正好合晒散戶愛股嘅條件，以上所講嘅負面因素其實大致反映喺股價身上，恐嚇通常會被誇張。

正如抽水壓力來講，幾隻內銀抽水前例牌偏軟，但抽水後反而龍精虎猛，𠵱家剩得農行（01288）同招行（03968）排住隊抽水，集資後可以做多啲生意，其實唔係壞事，之後又有排玩，交行（03328）抽水後走勢就明顯跑贏其他內銀。而9隻內銀不約而同喺舊年第四季增加撥備，無非係為今年不良貸款可能增加先行拆彈，以最後公布業績之中信銀行（00998）為例，不良貸款比率僅0.6%，有排都未到警戒線。

今年如無意外會減3至4次存款準備金率（RRR），一般認為減RRR實對內銀有利，但舊年正因為貸款僧多粥少，所以息率可以吊高來賣，今年減RRR之後貸款可以做多咗生意，但息差則同時收窄，但總括會對大銀行有利，農行累跌較多，所以博反彈會較有利。

嚴控「三公」銀基受害

中央政府將落實嚴格控制「三公」經費，一向被視為官場和商場送禮佳品的高端白酒銷路頓時蒙上陰影。

主要從事經銷高端白酒的銀基，股價自二月下旬裂口低開之後，毫無反彈之力，昨日更失守近月支持位5.3元，創52周低位4.78元，收報4.82元，跌幅10.5%，成交6,488萬元。

上述政策對公司收益產生影響已成定局，但影響程度有多大，暫難準確判斷，故亦難以評估股價何處是底。雖然14日RSI已回落至27，技術上已進入超賣區，短線觸發反彈亦不足奇，惟在基本因素未明，加上近期投資者對民企股信心低迷，古勝認為其反彈力水有限，現價唔值博，反之，持貨者宜留意，若反彈未能重上5元樓上，宜把握「逃生」機會！

古勝