絲絲記得舊年高盛前「盤房」主管施家文嚟香港開舖嗰陣，威勢一時無兩，仲一度傳出阿Morgan（施之洋名）要喺20億美元封頂，唔再接受新錢添。可惜一年之後，施家文似乎並唔係好似市場想像般咁「神」，其Azentus Capital成立至今，亦只係錄得跑輸同行嘅4.8%負回報咋。
其實，脫離「高盛」個牌頭自立嘅交易員，喺美國限制大型投行再進行坐盤交易後嘅一○年，有如雨後春筍！但似乎名氣愈大嘅，自立嘅表現就愈不濟。
好似施家文喺高盛坐正「盤房大佬」之前嗰個大佬Flamand，自一○年十一月成立Edoma Capital之後，到今年二月止嘅表現係負回報2.4%，比起採取相同策略嘅同行，喺同期普遍賺3.9%，輸咗足足6%。
都係啲老行尊講得好，「當你孭住高盛個牌頭，坐住幾百億銀彈嘅時候，梗係個個都當你friend啦；到你抽個身出來「食自己」嘅時候，你都要諗吓個friend字係點寫？！」