Market Insight：內銀伸手陸續有來

昨日恒指原地踏步收報20,668點，主板成交跌至442億元，是兩個半月以來最低，沽空佔大市成交比例，由上周初8至9%，到過去四日衝破雙位數水平，昨靜市中不跌反升，由11.1%升至11.4%。三月得返四個交易日，除非有意外兼震撼新聞，好似中國減息或QE3捲土重來，逼淡友冚倉，否則要高位季結機會日漸渺茫。

由人行二月減存款準備金率，翌日恒指開21,760點最後反高潮，指數約累積千一點跌幅，只係5%左右，惟不少中資股同期跌幅相當誇張，部分有代表性股份，比起二月底、三月初股價高位，跌幅均遠高於大市，安徽海螺（00914）跌20.2%、恒大（03333）跌19.7%、重農行（03618）跌18.5%，華能（00902）跌15%，一度炒核電設備重啟的東方電氣（01072）都要跌13.3%。

放大圖片

放大圖片

祖國地下錢莊水緊

周末飯局，投行賓架的路邊社消息，話近日內地地下錢莊水緊外，部分中資股陰陰乾下跌，背後同太子黨失勢，散水回朝有關。消息話撤資進行得如火如荼，係真係假無法證實，但客觀環境是祖國在兩會中提到放棄保八，跟住業績期見光死又佔大多數，三月中國PMI同新增貸款數字又可能令市場失望，短期只宜抱大大聲細細注心態，等調整完成，明顯支持出現先入市。

農行（01288）業績唔好，主要係去年第四季較預期高的撥備，唔少人擔心是睇淡信貸市場的舉動，怕其他內銀照辦煮碗，齊齊「盡撇」，之後工行（01398）及建行（00939）達標，疑慮稍為紓緩，可是另一積弱問題，係伸手集資補充資本的陰魂始終未散，交行（03328）得到一班策略股東關照，最叻做到要錢得嚟，不假外求。上星期業績後，民生銀行（01988）昨高掛免戰牌，以上周收市價折讓4至7%配售H股，集資額介乎110至114億港元。

農行招行料步後塵

要達到監管8%的資本充足率要求，民行管理層早已放風，考慮到內地發CB或在H股市場批股，對伸手要錢有晒心理準備，意外反而一日之間先後收三個卜架朋友致電問有冇興趣買啲。唔使八，都估到外面反應唔係咁熱烈。講到底，高盛手上工行解禁後隨時要錢唔要貨，從第三、四季業績推斷，四大行中，農行今年要錢機會極大，其餘三間，今年唔伸手難保一三、一四年唔使。

再數落去，明日業績後，招行（03968）過半數機會步交行及民行後塵，俗語話巧婦難為無米炊，近排流入股市資金又減少，芬佬難免要酌量減磅等折讓價接貨，形成內銀股愈跌愈質的惡性循環。

基本面，批股後民行資本充足比率升返去8.3至8.4%安全線樓上，最大不明朗因素消除，新股造成6%攤薄低過估計，而攤薄後一二年18%股東資本回報率，1倍左右市帳率，綜合而言估值幾吸引，昨日無人Call你唔緊要，如果復牌開出批股價水平買得到，不妨諗諗。

房屋政策存在變數

周日選舉結果塵埃落定，昨日本地地產股氣氛一洗頹風，其中新世界（00017）彈力最強，長實（00001）、新地（00016）和信置（00083）亦錄得升幅。之不過，古勝睇多家大行的報告，唔多唔少都觀望下任特首治理下的房屋政策，看來圍繞地產股的政策不明朗因素尚未完全消除。若然要繼續持有地產股，短期租金收入相對穩定的收租股，與對樓價敏感度較高的地產發展股相比，前者較為穩陣。