絲絲講場:建行公關主管陳去陳來

中資銀行要喺香港大展拳腳,人才可以講得上係最重要嘅一環。

建行(00939)董事會香港辦事處主管陳靜薇(Agnes)舊年離任之後,絲絲聽講有新人接任,原來就係富邦香港企業傳訊部個主管陳碧霞(Betty)過檔。

其實建行一直都視香港做走向海外嘅橋頭堡,Agnes當年出咗唔少力,可以話有功又有勞,但係呢個位殊唔易做,既要熟悉中資行文化,又要明白海外市場,Betty雖然係台資行轉過嚟,但係再之前都喺中資行打過工,幫董事會香港辦事處肯定得心應手啦。

估最快下周一蒲頭

聽講Betty二月底先至履新香港辦事處主管呢個位,但係好快就會同大家見面,因為建行呢兩日會公布業績。周一成班管理層嚟香港見記者同分析師,Betty好有可能都會在場同大家打招呼。

其實建行一直都好重視公共關係及企業文化部,好似之前呢個部門嘅總經理胡昌苗,一調任就去廣西高升做行長,可想而知佢哋幾睇重同市場溝通。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!