自從按揭證券公司喺上年七月推出安老按揭之後，市場反應一直都好過預期，去到今年二月底，已經有超過200宗申請。按證總裁劉怡翔（James）就未有放鬆，仍然好積極咁落手落腳做宣傳，聽講按證拍咗段長達半個鐘介紹短片，James親自披甲上陣出鏡。
James平時接受電視台訪問就多，但原來擺明車馬拍宣傳片，就真係第一次。據絲絲了解，佢表現好專業，無乜NG位，拍出嚟嘅效果都好一氣呵成。
今次James嘅拍檔仲有甘草演員朱維德，加上潘芳芳做主持，一問一答解釋長者對安老按揭嘅疑慮。絲絲尋日上按揭網站已經有得睇呢段片，聽講仲已經開始派畀銀行同一啲社福機構，等有興趣做安老按揭嘅公公婆婆有得睇。
其實按證為咗宣傳安老按揭，都已經好揼本，絲絲成日搭巴士同睇電視都見佢哋啲廣告，而按證呢兩年有好多新搞作，嚟緊仲有融資擔保計劃新產品同小型貸款計劃，絲絲都幾期待James再出嚟拍吓宣傳片。
據了解，由於安老按揭對象係大眾，兼要花更多心機令佢簡單易明，先至咁樣拍宣傳片。James下次幾時再上鏡，就要睇吓按證再有無呢類大眾化產品出台啦。
余詩韻