市場熱線：中旅憧憬有後着

祖國刺激消費竟然偷龍轉鳳，玩家具以舊換新，順誠（00531）、敏華（01999）同皇朝（01198）等股即開party，但其實前兩隻都係出口為主，純粹趁高興。所謂舊嘅唔去，新嘅唔嚟，幾時有衣服以舊換新呢？山東威高（01066）竟然話派紅股又唔派，好彩澄清之後升勢仍可維持，否則水洗唔清。

牛皮市成交奀

中視金橋（00623）派成績表後急升兩成，做廣告代理都咁發，其實亦多得阿爺個「限娛令」，逼人去睇中央電視台。講開阿爺台，上個禮拜搞咗個「315晚會」，啲「黑材料」多過我哋特首選舉，插晒麥當勞、家樂福同中電信（00728）等，中電信被指係垃圾短訊嘅幫兇。

中旅（00308）呢隻「超級悶股」喺舊年尾發憤圖強，大凡橫行期愈長，爆炸力就愈大，卒之以45度角連升兩個幾月，比大市早一步見底，又比大市早一步見頂，呢一個月走勢較反覆，喺上周四派成績表，賺咗接近7億銀，上周五有少少回吐，但計PE係12.7倍，計PB係0.65倍，睇好祖國旅遊業嘅話，中旅係最佳選擇。

睇番中旅份成績表，盈利勁升主要多得兩樣：酒店業務賺多50%以上同埋度假區業務蝕少好多，其他辦回鄉證同景區業務只係平穩。大凡分拆都係揀增長最快嗰瓣，所以中旅諗住舊事重提分拆酒店業務，而酒店業又多得自由行旅客貢獻，港澳5間酒店出租率達91%，平均房價856蚊。香港中價客棧仍係供不應求，但旺角維景酒店今年要大修，會減少收入。

起樓利潤更高

至於度假區分部業績蝕少3億銀，但其實主要靠唔使再計折舊費用所致，雖然係財技上嘅掩眼法，不過珠海海泉灣成功止血總算係個好消息，公司又搞新意思，喺珠海同咸陽海泉灣附近地皮起樓。就算𠵱家樓市跌咗，但做地產嘅利潤仍高過做旅遊好多，加埋塊地係自己嘅，話唔定會有一定「隱藏財富」。

祖國同胞有錢最鍾意旅遊，所以旅遊業長遠發展應該好景，中旅令人失望咗幾年，舊年開始有轉機，未來幾瓣業務都會趨於穩定，要增長可能要靠海泉灣。10零倍PE買隻唯一綜合旅遊股算幾抵，仲有分拆嘅概念，但隻股一時悶親人、一時又升到你唔信，𠵱家趁整固買入預咗睇番中線。

古勝