對於內地電訊商，能夠搶到蘋果公司嘅iPhone嚟賣，就包保有名有利。三大內地電訊商中，繼聯通（00762）後，中電信（00728）係第二個可以賣iPhone嘅公司，啱啱今個月九日開始推出iPhone 4S嘅CDMA版，上台簽長約零機價攞部機走。賣咗啱啱一個禮拜啫，中電信隨即喺尋日宣布，為滿足用戶需求，今日起，各大分店及坊間大型電器連鎖店都會開放iPhone 4S淨機（內地稱裸機）銷售。
就絲絲所知，中電信今個月二十日就公布業績，呢次全面開放賣淨機，擺明係造勢，實行有咁盡谷到咁盡，聲勢有幾浩大就造到幾咁浩大。事關根據里昂證券報告估計，藉着賣iPhone手機，中電信可每年吸納到300萬iPhone用戶。
據中電信有關人士同絲絲講，因為唔少用戶想給親友購買iPhone 4S，或者商務用戶喺節日期間，為客戶購買iPhone 4S作送禮之用，都有強烈購買淨機嘅需求。公司為了滿足廣大用戶多樣化嘅需求，於是決定開放iPhone 4S淨機銷售。
有關人士仲話，今次CDMA版iPhone 4S的銷售，主力靠好似國美、蘇寧、樂語、迪信通等內地主要賣場和手機連鎖店銷售，佔56%；而中電信銷售嘅比例則佔44%。
余絲韻