絲絲講場：千三萬紅提琴 聲靚有段古
另類投資有好多種，樂器係其中一樣。不過，絲絲想同大家分享嘅超貴嘅小提琴，有錢都未必買到，而且仲係一個有血有淚嘅小提琴添。
唔知大家有冇睇過電影《紅提琴》（Red Violin），講三百年前有一個著名小提琴匠，將啱啱因為難產過身妻子嘅血混同塗料，塗喺就嚟完成嘅一個小提琴琴身，從此呢個小提琴聲音妙絕，但又被人認為會為擁有佢嘅人帶嚟厄運。絲絲幾日前就親眼見識到呢個價值一百七十萬美元（約一千三百二十六萬港元）嘅紅提琴嘞。
信有靈氣 發揮更好
絲絲花咁多口水講電影故事，其實係想話電影入面有虛構嘅情節，亦都有真實嘅地方：紅提琴喺現實真係存在，而佢依家嘅主人，即係美國著名小提琴家Elizabeth Pitcairn最近嚟過香港，為深圳嘅演奏會做準備。絲絲好艱難先搵到機會見識吓個咁有價值嘅小提琴。
話說Elizabeth十六歲時，佢爺爺就用一百七十萬美元喺佳士得倫敦拍賣會買咗呢個小提琴送畀佢。Elizabeth雖然係鬼妹仔一名，但都相信有靈體附喺琴身上，不過唔係帶嚟厄運，而係將小提琴嘅聲音發揮到淋漓盡致。絲絲雖然對古典音樂一知半解，但聽住Elizabeth嘅演奏真係覺得如癡如醉。
余絲韻