內地股民呢輪狂炒中小板嘅新股，由中證監主席郭樹清苦口婆心力勸大家要謹慎，到滬深兩個交易所輪流炮製抑壓炒新嘅措施，但點都撳唔住啲股民，搞到交易所面目無光。最後勒令班炒新股嘅大戶罰抄，將交易規則從頭到尾抄一次！吓，居然係罰抄？交易所似乎真係好嬲咁噃。
為咗撳住個市嘅炒風，絲絲喺內地嘅金魚缸老友話，交易所金睛火眼睇實啲交易，只要發現異樣，就即刻打電話去落柯打交易嘅證券營業部嗰度，警告班炒家收手，唔係就將佢限制交易。有股民入咗兩萬股，就收到深交所call話唔准再買，原本諗住晏晝買多5萬股、全部動用二、三百萬人仔買嘢，畀人「盯」住梗係唔敢郁。
接到交易所電話警告都係小事，傳聞有啲大戶當場畀交易所罰佢哋將交易規則由頭到尾抄一次，然後寄番去交易所。聽到嘅證券交易員當時笑到碌咗落地，「嘩！都到咗『體罰』嘅程度，睇嚟交易所真係發嬲。」咁嘅懲罰可能冇乜根據，但假如交易所要你抄，邊個夠膽唔抄？佢同你玩真，將戶口凍結三個月，咁嘅代價咪仲大！
余絲韻