絲絲得閒就鍾意上Twitter，志在八卦吓，無喇喇見到有個叫@federalreserve嘅帳號，心諗邊個喺度惡搞啊，連堂堂聯儲局都夠膽玩？一撳入去真係當堂嚇親，原來係堅嘢嚟o架！
近排聯儲局主席伯南克頻頻蒲頭，鍾意玩「高透明度」就係人都知o架啦，只係無諗到佢為咗咁，連Twitter都玩埋啫！
佢話個Twitter帳號係用嚟發表吓佢啲新聞稿、演說、聲明同埋向國會提交嘅報告，就連每周嘅資產負債表都放埋上去喎！
好啦，講到咁多嘢睇咁，但Twitter只係畀人輸入140字嘅更新，點放咁多嘢啊？絲絲上到去睇，真係一片冷清，得嗰幾條link引你入去睇佢啲「宣傳」。
究竟伯南克咁樣做係好係壞就見仁見智啦，有啲人話佢咁樣做可以同公眾打成一片，促進溝通喎，又有人講笑咁話佢咁做係咪即係意味美國負債限住喺140個零位之內。
但講多無謂，數字最實際！自從帳號喺周三成立以嚟，關注者人數去到一萬多啲，係多係少自行定奪啦。
余絲韻