內地發展商SOHO中國（00410）老闆潘石屹，鬼主意多多，佢之前揚言要發行嘅「潘幣」已正式面世！尋日絲絲撞到潘總，潘總隨即畀咗個信封絲絲，打開一睇，原來係一套「潘幣」！
「潘幣」一共三張，三張嘅設計分別好似人民幣、美金同歐元，全部都印有潘總上半身嘅頭像，背面分別係旗下嘅出品：望京SOHO、SOHO中山廣場同埋虹橋SOHO，印刷精美之餘，上面更有「壹潘」、「1 PAN」嘅字眼，而全部都係由「SOHO中國銀行」發行。
講番「潘幣」嘅來由，話說潘總喺微博上寫話，蘋果公司應該大量生產每部售價低於1,000蚊人仔嘅iPhone同iPad，作為對喬布斯最好嘅紀念。但點知引起唔少網友嘅不滿，又話，「潘總哪天要是也去世了，也請貴公司推出1,000元人民幣一平方米的房子吧」，網友仲話要求物價局備案，製作了「潘幣」，潘總亦被網友戲稱為「潘一千」，而「壹潘」亦都成為風靡網絡嘅一個數量詞，即係每平方米1,000元。
近期中銀推出嘅百周年紀年鈔票全城熱炒，唔知潘總發行嘅呢套「潘幣」有無機會炒下咁呢？