市場熱線：市況反覆提高警覺
溫總臨別贈言，結果搞到中港魚缸齊冧，主要係嗰句：「房價還遠遠沒有回到合理水平。」講嗰時未到中午，唔知係唔係反應遲鈍，港股下晝開市都冇乜點，但之後先跟住A股跌。究竟阿爺心目中點先叫跌夠？大家都冇個底，房產稅都有得計，孖屐最驚係唔知點計數。但香港上市嘅內房股其實冇乜點跌，合景泰富（01813）、碧桂園（02007）及雅居樂（03383）等仍可逆市上升，不過，內房A股則跌得傷啲，香港勝在發債發股都較容易。
溫總仲話人仔會雙向波動，人仔呢幾日亦都重創，通脹回落、貿易逆差加埋美金轉強都不利人仔走勢，唯一寄望係人仔要行國際化條路就需有秩序升值。呢排歐美好消息多籮籮，花旗國零售數據好、聯儲局調高經濟展望、摩通又調高派息，而啤酒國經濟強勁，尋日意粉國賣債孳息再回落，帶動歐股早段再升。
道指滬綜各走極端
美股隔晚創今年最大單日升幅，但A股則創今年最大單日跌幅，滬綜指倒跌2.63%，滬深加埋成交達3,276億人仔，睇成交就知下晝嘅沽盤幾咁兇猛。祖國呢排隔幾日就有單似是而非嘅「壞消息」，溫總話GDP增長7.5%已絕對唔算低，但班外資大行就唱你經濟硬着陸。
道指衝破萬三，日經衝破一萬，港股尋日開市前形勢大好，但早段升得兩舊幾已嫌唔夠喉，而且陰陽怪氣，之前單天保至尊嘅祖國移動（00941）喺派成績表前夕漏晒氣，瑞銀打對台唱淡，目標價得70蚊。大戶反而舞起除息嘅大笨象（00005），雖然話老美提前公布壓力測試結果利好國際錢莊股氣氛，渣打（02888）亦升2.45%，但個款似「趕住收工」，呢兩日共有72隻熊仔陣亡。
恒指收市倒跌31點，呢排升市成交少、跌市就成交多，尋日成交增至超過800億元，而且下晝跌市成交多過上晝升市。恒指由高位回落超過300點，睇走勢同二月六日以及二十日嘅穿頭破腳陰燭相似，之前兩次走勢同樣肉酸，但跟住個市仍反覆創收市新高，今次又來「反高潮」，大市只可以講係反覆而未必代表玩完，但幾時都係小心駛得萬年船，買少日股票又唔會少忽肉，古勝今日都會掛住免戰牌。
內需板塊仍有可為
跌市仍有唔少股票好炒，最明顯例子係中國稀土（00769），稀土禁出台有得炒，解禁亦可以炒一餐。另外，內地零售股呢排當旺，雖然今年頭兩個月消費增長放緩，但祖國為谷消費，由清明到勞動節會搞個「全國消費促進月」，加埋金鷹（03308）、利邦（00891）同利郎（01234）嘅成績表都攞高分，所以近日百貨股同男裝股都勁升，但點解淨係升男裝、唔升女裝呢？皆因男人買衫唔多，但個袋有錢會捨得買貴價衫（西裝來來去去款式冇大差異），所以高端男裝股增長特別勁。
異動股仲包括兩大碼頭股招商局（00144）同中遠洋（01199）、兩大鋼鐵股鞍鋼（00347）同馬鋼（00323）、仲有兩大醫藥股國藥（01099）同上藥（02607），全部都係升兩隻但並非整個板塊上升，唯一解釋就係芬佬要大唔要細，買龍頭股幾時都有着數。