內地再傳有推動內需的政策出台，消息令尋日一眾百貨股炒上。其實講到內需，範疇可以相當廣泛，只係市場好多時都將着眼點放喺零售股身上而已。主要從事生產玉米澱粉、賴氨酸以及其他玉米深加工及玉米製副產品的中國澱粉（03838），由於產品可應用於多個行業，包括啤酒、食品、飲品及飼料等，所以可全方位受惠國家的推動內需政策。
受惠於市場強勁需求以及玉米澱粉和賴氨酸平均售價大幅上漲，集團去年上半年業績理想，純利增長47.9%至1.3億元人民幣，而即將於下個星期五（二十三日）公布去年全年業績，預期亦唔會令人失望。股價由年初低位0.23元，升至上月在0.345元見頂後，回落至0.29元水平企穩，尋日突然發力急升6.6%，收報0.32元。
以現價計算，中澱現價往績市盈率得9倍左右，相比同業大成生化（00809）的16倍平一截，加上國策同業績因素加持，要破上月高位應該冇難度，阻力位先睇0.37元，支持位在0.29元。