依家要喺華爾街「造假」，真係愈來愈難啦！喺金融改革法案嘅金剛箍下，好多嘢都唔做得o架！
唔講唔知，原來個法案仲講明，任何人只要向美國證交會（SEC）就商業罪行爆料，就可以獲得SEC攞到嘅賠償，或者和解費入面嘅10至30%，當係獎金咁話喎，真係「有錢使得鬼推磨」！
絲絲仲聽到SEC嘅一位高層講，歡迎任何「二五仔」上門提供可靠資料，例如內部文件同錄音帶等等，係好有力嘅證據喎，咁又係嘅，由內部人士提供嘅料點都堅啲啦。睇嚟以後班賓架同芬佬想做假帳、內幕交易同操控市場都幾難喇。
話雖如此，但有當地律師質疑，SEC究竟有無咁多資源去做咁多調查呢？雖然「重賞之下必有勇夫」，爆吓料就分分鐘有成幾百萬美元落袋啫！
但係SEC過去八個月入面，已經收到大量消息人士爆料，之不過，到依家都仲未有人攞到獎金。