孖妹缸湖遊：緬懷出市員的大時代

黃：香港證券及期貨專業總會理事黃笑媚

張：飛達證券出市代表張麗芳

放大圖片

放大圖片

祺祺： 出市員係一項具挑戰性嘅工作，你哋當初係點樣入行呀？

　張： 我畢業後就到證券行工作，當時要由低做起，由跑街送股票，到喺盤房接單落盤，之後公司見我辦事效率高，就委派我到港交所擔任出市員，到依家已經做咗約廿年喇！

公開叫價形式成絕響

　黃： 我本身喺證券行做會計，後來對股票投資產生興趣，就考牌擔任出市員。我八九年到交易大堂工作，當時仲未有中央結算，主要透過公開叫價方式進行股票交易，要靠人手作紀錄。假設有客戶打電話嚟落盤，想買十萬股滙控（00005），我哋就會叫價，要埋其他行家啲股票，直至湊足十萬股。不過依家由中央結算，透過電腦對盤進行交易，做法已唔同晒啦！

高妹： 你哋睇《大時代》會唔會有共鳴o架？

　張： 《大時代》套劇集太戲劇化喇，又「掃呀」又「沽呀」，我們做嘢又點會咁亂嚟呀！

　黃： 出市員嘅工作邊有咁誇張，我哋都係跟公司同客戶嘅需求去落盤！不過，呢套劇帶出嘅「丁蟹效應」，又確會影響到真實嘅金融市場，當鄭少秋主演嘅電視劇集播放時，有啲客戶會擔心跌市而沽貨。

祺祺： 你哋嘅「紅衫仔」形象亦因此而深入民心！

　黃： 以前我哋係以公開叫價嚟買賣股票，行家就係倚靠紅衫上嘅號碼做記認。不過，自從可以透過電腦進行交易後，紅色背心嘅用途已經唔大，依家主要係為咗形象啫。

高妹：出市員成日緊貼個市，係咪可以預測市場趨勢？

　張： 因為出市員消息靈通，較為了解市場動向，相對容易捕捉投資時機。我哋直接處身喺市場內，所有資訊都可立刻獲知，咪可以喺第一時間通知客戶同埋畀建議，好等佢哋有所部署。若然喺寫字樓工作，得知升市跌市後再查明原因，節拍難免慢咗一步，喺呢個變幻莫測嘅金融市場就會執輸！

祺祺： 的確，股票炒賣係速度遊戲，着重每分每秒嘅競爭，工作壓力咪好大？

　張： 出市員嘅壓力並唔係人人可以承受到o架，因要處身喺波動嘅金融世界，講求速度同準確度並唔容易，工作壓力無疑比較大，即使放工後亦會留意美股消息，所以夜晚會容易失眠。

高妹： 你哋都係喺風雨中走過嚟，回首往昔，邊次金融危機最不堪？

　張： 對早幾年金融海嘯嘅印象好深刻，唔少客戶因雷曼而一鋪清袋！唉，雖則「食得鹹魚抵得渴」，從事股票炒賣需要承擔風險，有時輸錢係在所難免，但雷曼係百年「老字號」，原本係低風險嘅投資產品，卻被炒作成高風險嘅衍生工具，所以唔少客戶因為輸咗老本而深深不忿！

　黃： 九七年亞洲金融風暴亦都相當難忘！當時可謂「全民皆股」，金融市場相當鼎盛，但一個浪冚埋嚟，連藍籌股都可以跌到得番幾蚊！

祺祺： 其實，要數經典事件，又點離得開滙控股價跌至33蚊呢件事！

　黃：當時整個交易大堂都起哄，驚嘆聲、嘈雜聲、吵鬧聲紛紛而起！

　張： 係呀，當時無不嘩然！我嗰時望住股價都相當氣憤，點解大戶為咗賺錢，可以將滙控股價殺到落33蚊！

高妹： 出市員可謂「買少見少」，依家個場多咗好多「吉位」！

　張： 交易大堂最高峰時有九百幾個出市員，依家就好稀疏，只係剩低百餘人，根本唔似國際都會嘅金融市場！依家市場氣氛已經冷冷清清，連帶我哋班出市員嘅士氣都非常低沉。

港股加時變相減人工

　黃： 呢個行業可謂夕陽行業，港交所舊年大幅加租，加上成交下跌，已令唔少經紀行交人，唔再續租交易枱，依家仲要延長交易時段，無助交投量之餘，我哋亦變相減人工，只係「有得坐，無得做」。經紀行嘅生意亦愈嚟愈難做，寧願將出市員搬返自己公司以減少成本支出。

祺祺： 既然可以喺自己公司進行股票買賣，港交所啲交易枱仲有咩價值呢？

　黃： 經紀行尚會捱貴租，主要係為咗保險。若然辦公室停電，或電腦出現故障，交易大堂都可以有人操盤，進行股票交易。中小型經紀行嘅資金有限，若要加錢提升電腦系統，寧願保留交易大堂嘅出市員，成本反而少啲，因出市員嘅薪酬是以拆帳形式畀嘅，需要維持交投量先有薪水o架！

高妹： 近年港股交投比較淡靜喎，你點維持生計o架？

　黃： 依家嘅薪酬已經大不如前，不過我哋入行咁耐，咁多年嚟儲落一啲熟客，依家惟有保持市場警覺性，幫佢哋低買高賣，以維持成交量。不過，上市公司集資只係為賺錢，掛牌後股價即刻潛水，未能夠畀到投資者承諾同信心，先至係問題所在。

祺祺： 唉，我哋啲股票都等緊返家鄉呀！不如分享吓出市員嘅光輝史呀！

　張： 九○年代係出市員嘅輝煌時期，我記得九七年要繳交嘅稅項去到六位數字喇！雖然嗰時工作忙碌，但卻相當開心，因可運用自己能力幫客戶賺錢。然而，港人經歷咁多個金融風浪後，唔少財產已被蒸發，無錢再投資喇！

高妹：你哋係香港嘅金融形象代表，對香港嘅金融發展可謂功不可沒，咁多年嚟有咩感受呢？

獲客戶信任滿足感大

　張： 出市員呢份工充滿挑戰，講求速度亦着重準確度，唔係所有人都可以勝任。不過，咁多年嚟最獲安慰嘅係客戶對自己嘅信任，入行時由「零」儲起，到依家演變成親人、朋友，無所不談，係做出市員嘅最大滿足感！

　黃： 市場消息愈嚟愈多，但當中孰真孰假，需要靠自身嘅經驗知識分辨，千祈唔好道聽途說去做交易買賣。

高妹、祺祺

若有料報畀高妹同祺祺或有嘢問，可電郵money.biz@opg.com.hk