中國企業近年積極走出去，但就成日畀人「圍剿」，成功個案唔係好多，石油行業就係一例。之不過，能源情報集團（EIG）就揀咗中石化董事長傅成玉，做今年全球石油行業嘅最佳高管，仲係第一位亞洲石油公司嘅高管有咁高嘅殊榮添！
EIG大讚傅總係有變革性嘅代表人物，無論同國際石油公司合作，抑或投資石油天然氣都好有經驗，係「中國石油行業邁向全球化嘅催化劑」，呢個評語確實可圈可點！話晒中國買外國石油資產最矚目嘅一單刁，就係傅總仲喺中海油嗰陣，大拿拿用185億美金購買美國優尼科嘅壯舉，雖然壯志未籌，但已經夠班花旗國民睇到眼擎擎喇！
傅總過檔中石化之後，依然冇令大家失望，創造唔少矚目大刁，仲揚言要將中石化打造成世界一流嘅能源化工公司，可謂雄心壯志，呢樣就係企業家嘅風範囉！