本港手機網絡商，早前搞出手機無限上網計劃面臨終結嘅疑雲，最後雖然保得住，但點樣更有效提高數據傳送效率，係移動通訊行業未來嘅一大難題。長實（00001）主席李嘉誠旗下嘅私人創投基金維港投資，一向有投資新進嘅科網公司，外電話維港近日入股以色列嘅流動數據方案公司onavo，瞄準全球移動數據市場嘅新一浪投資機會。
行內人已有共識，取消無限上網係環球市場大勢所趨。維港投資今次夥拍Motorola Mobility等共同投資1,300萬美元，以第二輪融資方式入股onavo，呢間公司最主要嘅產品，係結合壓縮數據資料及監控數據用量於一身嘅手機軟件，使手機用戶能以最具效益嘅方式，使用手機上網服務，呢套軟件目前喺iPhone及Android兩大平台都極受歡迎。