絲絲講場：林炳昌同無縫綠色「分手」

聯交所資料顯示，Andrew三月一日以每股0.157元，響場外悉售手上2,800萬股無縫綠色，套現近440萬元，但較市價低咗近87%！股權由13.22%降至零，而駱春宇就申報持有7.08%股權。無縫綠色一月六日起停牌，十九日宣布以每股0.5元三供一，響三月六日每股1蚊發行擴大後12.4%新股集資，停牌前報1.18元。

沽清股份 明賺實蝕

Andrew同絲絲講，「公司發咁多股係想攤薄我（股權），諗落無謂再糾纏落去」。佢話早前有個經紀同佢傾，幫佢賣晒手上嘅無縫綠色股份，結果由三個投資者分咗，Andrew相信駱氏買最多而要申報，另外兩個少於5%而唔使申報。但Andrew強調唔識呢班人，亦唔想再浪費時間同金錢響公司爭拗。

咁點解「超低價」賣股呢？Andrew苦笑話，嗰批其實係早年持有嘅認股權，每股成本只係6仙，而家以0.157元賣，其實每股賺9.7仙，帳面就賺二百幾萬，但佢舊年「搞全購」使咗近600萬律師同財務費，「其實蝕住走」，未來會專注佢嘅律師樓業務。

無縫綠色喺一○年十一月底委任Andrew做主席兼執董，但舊年八月就內訌，Andrew用四成折讓價向公司提出全購，之後Andrew就被踢咗出董事局。

余詩韻