股神巴菲特粉絲年度大事──巴郡股東大會又嚟喇。今年嘅股東大會將會喺五月五日星期六舉行，但巴菲特嘅助理日前「事先張揚」，話巴菲特同副手芒格時間所限，會改變傳統，取消每年股東大會之後嗰日嘅記者會。至於股東會嗰日，兩位仁兄忙住去邊，公司就冇交代到。
為咗補償，巴菲特將會喺股東大會上回應三名記者同三名財經分析員嘅提問，而記者提問係喺股東問題中篩選出來嘅。
每年巴郡股東大會都係盛事，皆因巴菲特同芒格會毫不吝嗇咁，用近6小時回答股東形形色色嘅提問，同股神近距離接觸，你話幾值錢呀！難怪每年都會吸引來自世界各地嘅股神信徒，湧去巴郡大本營奧馬哈朝聖，舊年就有4萬名股東出席。
唔單止咁，喺巴郡嘅股東大會，股東除可向股神取經，仲可以盡情購物，分享巴郡旗下眾多業務，巴菲特舊年就喺鐵路王BNSF嘅攤位，一邊食雪糕一邊欣賞火車模型。據悉，巴菲特今年會再次充當巴郡旗下珠寶店Borsheim's嘅售貨員，同股東近距離接觸。
巴菲特亦係世界級富豪，經常入選富豪排名榜。內地嘅胡潤，今年都增設全球富豪榜，股神當然入選。排首位係墨西哥電訊大亨斯利姆（Carlos Slim），蓋茨同巴菲特位列二、三位。華籍富豪之中，李嘉誠排十三位，亦係排得最前嘅華人，郭氏兄弟、李兆基、鄭裕彤都入榜，娃哈哈老闆宗慶后就排名78。