市場熱線：調整市買貨咪心急

嚴守紀律至緊要

隔晚道指拗腰收復不少失地，惟納指卻跌近0.9%或者25點收市，報2,950點，皆因一隻股票已拖累12點之多，所講嘅正係市值一度超越5,000億美元，即3.9萬億港元的蘋果公司。今年華爾街炒iPad3的熱情，實在不比旺角先達炒家遜色，蘋果公司股價由年初的405美元炒到最高見548美元，全球最大市值股票都升成咁，堪稱巨象起舞，今晚iPad3正式見街，前晚股價開始見反高潮，出現sell on pad（fact）情況。睇番近期瑞聲（02018）被多間大行唱好，iPad3概念同樣炒得不亦樂乎。

尋日港股幾乎由頭跌到尾，恒指收市大跌459點，成交扣咗友邦（01299）批股上板後仍增至800億元，期指成交亦升至9.2萬張，好多止賺、止蝕盤一齊出籠。古勝一直話呢個升浪冇乜調整過，最多調整300點左右又升過，直情係「唔怕你精，唔怕你呆，最怕你唔來。」基金同散戶手上大把現金，一挾上自然逼人追貨，唔怕散唔到貨。

放大圖片

放大圖片

古勝唔敢講個升浪已經玩完，但嚴守紀律先可以穩坐釣魚船。尋日亞洲魚缸除咗新加坡跌約2%之外，其餘大部分跌幅都係1%樓下，港股不嬲係升就升得多過人、跌又跌得多過人，睇港匯一向係參考指標，尋日收報7.7623，同前日變動唔大，未算資金大逃亡。

友邦派成績表後被大行唱好充滿「陰謀論」，但半年後AIG又有新貨供應就會限制未來升勢。收市後期指低水擴闊，國壽（02628）又發盈警，舊年可能賺唔夠200億人仔，而大行預測佢會賺230億人仔，阿門！

大戶輪流劏牛熊

要插你其實唔使搵理由，有理由亦係市場夾硬搵藉口，罪魁禍首係阿爺放棄「保八」，但其實之前公布「十二五」規劃嘅GDP目標都係年增7%，而祖國做呢類預算一向作風保守，個口話7.5%，但實質目標已經係8%樓上。以前「保八」係小平同志時代所定，意思係十年內GDP增長1倍，但嗰時係一窮二白年代，依家已係小康水平，個基數已大咗幾十倍，如果年年有8%增長，豈非好快可趕美？未來祖國可能唔「保八」，要「保七」、甚至「保六」。

兩會亦一早預咗冇料到，因為會議只係提意見同「舉手機器」運作，所有建議如養老金入市、降低奢侈品稅同擴大房產稅試點均係留番以後從長計議。上海唔單止叫停外地人買第二套房，仲搞搞新意思，部分地區唔畀未婚子女買第二套房，咁即係歧視未婚人士啫。雖然內地有唔少富二代，但古勝相信影響只係有限，要買樓大把窿路，上海目的只係向阿爺交功課但非交心。

尋日40隻牛仔即時被劏，劏完熊改行劏牛好似好簡單，但其實好易當局者迷。逆市奇葩係兩隻石化股同幾隻食品股包括旺旺、中食（00506）同中綠（00904）等，車股同水泥股跌得甘，之前阿爺規定公家車要用國產，計落一年可以做多幾十萬部車生意，但跟住歐盟又可能報復限制國產車入口，到頭來冇乜着數。

個市升咗約3,500點，兩日來回落約750點，所以恐防調整未完，古勝暫時都係睇定啲先，但若有機會見兩萬點就唔怕買。