講咗咁耐，延長交易時段已經喺昨日正式開始。放飯時間由原來個半鐘縮短至一個鐘，令到Prof. J嘅工作方式都要跟住變。出街同客午飯幾乎已經冇可能，只有自嘆辛苦命，真陰公。經紀業界班老友記實唔合皮時間上長咗，成本又幾何形式增加，生意又可以阿李總話頭，無立竿見影，老友記就自然減人工。
時代巨輪不斷進步，電子金融亦慢慢形成一股力量，證券行業由開始走上電子路，都由港交所（00388）拖住你隻手來行，你無得唔行。小型券行嘅資訊科技上嘅核心能力遠遠低於華資大行同投行，似乎證券行老友記都要好好為自己搵出路方為上策。
講開搵出路，Prof. J幾時都欣賞朱太，見親佢都珠光寶氣，華麗登場，雍容華貴就梗係唔使講。呢期開始向高檔次手錶業務出發，講嘅係佢以私人名義買起先施錶行（00444）75%控股權，佢話睇中公司持有嘅品牌Franck Muller。
今時今日，以朱太嘅卡士，喺金融界嘅影響力同人氣，一個唔覺意同客傾生意做埋隻錶嘅代言人，一邊做企業融資，個客搵到錢又幫朱太買番幾隻錶相贈好友。好一招「一石二鳥」，贏晒！朱太真好嘢。先施錶行9.63倍PE唔算好平，但收歸己有難度較低，以朱太個人名義嘅股必有睇頭，繼續追蹤，出發。