○七年蘋果公司出iPhone嘅時候，為咗顯示公司唔再只係賣電腦，將公司名由「蘋果電腦」改為「蘋果公司」，尋日內地都有公司話諗住有樣學樣喎！
呢間公司大家應該都幾熟悉，就係喺香港都有唔少分店嘅蘇寧電器嘞！佢哋嘅董事長張近東，話考慮唔要公司名入面「電器」呢兩個字，仲話目標係要做「沃爾瑪+亞馬遜」喎！
事緣蘇寧今年打算大力發展佢哋嘅網上銷售渠道「蘇寧易購」，計劃將佢嘅規模擴大4至5倍，同埋員工人數加到3,000人；而蘇寧易購依家其實除咗電器之外，都已經有好多唔同嘅嘢賣，所以就怕「電器」兩個字會阻礙公司未來嘅發展。
蘇寧副董事長孫為民之前都曾經講過，希望用蘇寧易購喺網上「再造一個蘇寧」，特別係擴充百貨同服裝類產品，仲話「除了不賣新鮮其他甚麼都賣」喎！你估佢話唔賣濕貨，定係寸緊國美電器（00493）賣iPhone4S呢？