絲絲講場:多啲女董事 回報勝一籌

三八婦女節又到!有調查歌頌女性,話女性佔董事會人數比例高嘅公司,資本同埋股本回報率會勁啲。

恒生董事會 三成女性

調查係由渣打銀行及社商匯賢合作做嘅,結果顯示,喺48間藍籌企業嘅董事會當中,女性董事佔比只有9%,其中銀行股就包辦晒三甲,有最多嘅女性董事,分別係恒生銀行(00011)、中國銀行(03988)同滙控(00005)。

話晒有香港首位銀行女大班梁高美懿坐鎮喎,排名第一梗係恒生,16位董事有5位係女性,佔比達31.3%,其餘嘅女董事係薛關燕萍、蔣麗苑、馮婉眉、李瑞霞。最巧合嘅係,連梁高美懿嘅接班人,都係由女性接掌,即係現任滙豐香港及中國嘅顧問李慧敏,所以由女性去主導恒生嘅勢頭,應該都至少會keep多幾年。

男女「平等」 要百五年

調查又發現,女性董事佔比較高嘅公司,佢哋嘅資本同埋股本回報率都勝過其他公司o架。中行15位董事有4位係女性,而滙控,17位董事有4位係女性。

不過該調查嘅發言人話,香港嘅企業話事人,考慮升職人選時顧慮到女性要照顧屋企,或者女性辦事無男性咁投入嘅情況好普遍。佢又話,現時女性董事佔比得9%嘅香港,要實現30%就要等多80年,50%的話則要等156年。

環顧全球,挪威女性董事佔比居首40.1%、美國就16.1%、英國就15%。絲絲認為,香港作為國際金融都會,仲要女多男少,要打破大部分人有男主外,女主內嘅傳統思想,應該唔係好難。

余詩韻

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!