絲絲講場:內地「獨董王」身兼17職

喺電影蜘蛛俠裏面有句名言,就係「能力愈大,責任愈大」,即係話能者多勞喇!但如果要同一時間做16個職務,你估蜘蛛俠仲有冇精力同能力做埋第17個呢?

近日內地有位巾幗英雄王曉濱,佢有20年國際資本市場投資、融資經驗,仲做過投資銀行添。京城著名學府請佢講學,中央同地方政府好鍾意搵佢諮詢政策,佢咁出色,令到好多上市公司都對佢愛不釋手。於是佢就先後做咗16家唔同嘅上市公司管理層,最近終於出現第17家,搞到深交所要查個究竟。

深交所怕忙中有錯

最新嘅係旭飛投資,想請王曉濱做獨立董事,同時做埋薪酬與考核委員會委員一職。深交所驚佢太忙,會降低咗公司嘅管治質素。旭飛就回應,王曉濱喺嗰16家公司多數係「閒職」,唔驚佢履行唔到獨董嘅職責。睇嚟第17項任務,可能又係「閒職」噃。

獨董價碼有高有低,依家A股陸續出緊年報,發現出手最豪嘅係華發股份,獨董一年袋20萬人仔;畀酬金最少嘅係宇順電子,佢哋有位獨董只攞得四千蚊人仔咋。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!