絲絲講場：馬時亨離中策淨做顧問
喺政經兩界吃得開嘅馬時亨（花名肥亨），離開政府後加入咗中策（00235），一心一意搞掂收購南山人壽嘅大刁，最終買唔成，肥亨覺得已經完成歷史任務，決定辭去主席兼非執董職位。
有人話肥亨係鋪路做番官，佢話絲絲諗多咗，辭職同政治嘢無關架，唔係要加入政府。佢話南山人壽單刁告吹，覺得一家公司唔使有兩個咁大粒嚟坐鎮（另一粒係行政總裁柯清輝），費事好似齋出糧咁，減番一個對股東係好事。
柯大俠接任主席
佢同柯大俠一向老友鬼鬼，早幾個月前佢就提出辭職架喇，柯大俠挽留佢，拉鋸到依家至公布。不過佢話會留喺中策做高級顧問，幫公司同內地溝通咁話，至於中策主席個位就由柯清輝接任喇。
肥亨喺政商界都吃得開真係人盡皆知，當年加入中策領軍收購台灣嘅南山人壽，好多人都好期待。可惜人算不如天算，南山單刁始終過唔到台灣審批，肥亨嗰陣都好失望。何況當年中策預咗成一億股威士畀肥亨，本來就好和味嘅，但南山人壽收購唔成，呢批威士就落唔到袋喇。
不過，肥亨依家仲係好多公司嘅董事，好似農業銀行（01288）、華潤置地（01109）咁，所以就算辭職，呢位猛人都唔會寂寞嘅！
余絲韻