內地愈嚟愈興玩微博，絲絲尋日喺「中國地產官方微博」上面發現一條「求證：北京某房企夫妻檔已暗離？」嘅微博，吸引咗唔少網友強烈關注，雖然微博上面無寫明係邊個夫妻檔，不過唔少人即時估係曾經多次傳出婚變嘅SOHO中國（00410）董事長潘石屹同佢太太張欣，而坊間仲盛傳SOHO中國「大權」其實已經落入張欣手入面添！
身為「微博達人」嘅潘石屹，對於今次呢個傳言並無任何表示，絲絲亦都就呢件事問過公司，不過公司就話無回應喎，咁又係嘅，其實網上又無講到係邊個，無謂對號入座啦！
佢哋呢一對喺好多人眼中係個傳奇。話說大家相識咗只係四日，潘石屹已經向張欣求婚，嗰時佢仲未發迹，但張欣已經係華爾街嘅投資銀行家，呢樣差異並冇影響張欣對佢嘅睇法，喺九四年真係嫁咗。期後雖然傳過佢哋分開，潘石屹有一次仲以「純屬謠言」嚟回應傳聞。絲絲希望今次嘅傳聞，都唔係真嘅。
余絲韻