美國NBA紐約人嘅當家控球後衞林書豪強勢崛起，喺全球捲起咗一陣陣嘅人潮同錢潮。財經雜誌《福布斯》於是喺「林瘋」身上整理咗畀企業嘅4堂課，各位打工仔都啱睇o架噃。
第一係工作環境同團隊，對你嘅成功非常重要。喺加入紐約人之前，林書豪先後畀勇士同火箭放棄，雖然佢依家紮起咗，但球隊裏面係有某啲因素幫佢完全發揮潛能，所以唔好將班天才橫溢嘅商業專家，隨便擺埋同一間辦公室就算，你需要嘅係經驗老到嘅領袖，培養尊重同團隊合作等心態，至可以化衝突為成就。
第二，要為一夜成功嘅成果做好準備。當你嘅產品一夕爆紅，就要面對更多營運上嘅挑戰、棘手嘅公共關係，甚至係對手嘅反應。成功會帶嚟紛爭同妒忌，要謹記注意形象，以前冇人理嘅失誤，隨時可能變頭條新聞，搞到你身敗名裂。
第三就係要堅持不懈。林書豪有哈佛學歷，大可揀條安全嘅路嚟行。但佢同好多成功企業家一樣堅持不懈，保持樂觀，咁樣先至可能將事業搞得成功。最後就係機會出現喺眼前，就要好好把握。如果你發現新趨勢，就要搶喺人哋前面，盡量將效益發揮到最大呀。
最後一樣就係要飲頭啖湯，搶喺其他競爭對手起動前，就攞盡甜頭。佢哋舉咗個例子，慈善機構都用呢個方法，搶先用林書豪對湖人着嘅球衣，籌到四萬幾美元。
余絲韻