絲絲講場：老婆掌恒生袁天凡退隱？
袁天凡（Francis）嘅財技唔使絲絲多講，可以話金融圈無人不識。佢離開電盈之後，靜咗一排，太座李慧敏重出江湖，將會執掌恒生銀行（00011），令金融界又再懷念起Francis。據絲絲所知，佢幾個月前靜雞雞加入咗間對沖基金公司，唔知幾時開始，可能又靜悄悄離開咗！
或已離開Ortus?
Francis喺舊年中，做咗泓策（Ortus）呢間對沖基金公司嘅主席，呢個消息曾經帶來無限憧憬。絲絲尋日搵過Ortus個網站，睇勻晒成棵family tree，都搵唔到Francis袁呢個名，令人揣測Francis已經結束咗喺Ortus僅八個月嘅短暫工作時間。
基金界老友就話Ortus嘅創辦人叫周全（洋名Joe），喺金融界甚為吃得開，客戶層面極廣，甚至包括有主權基金。據講，Francis舊年七月加入呢間對沖基金時，好似都對前景充滿信心，仲好積極咁日日都返公司打點。老友就提醒絲絲，佢兩公婆一早已經上咗岸，仲會唔會喺中環搏殺，真係興趣行先。