一代NBA巨星米高佐敦（Michael Jordan）控告中國喬丹體育嘅名義侵權案，尋日有新進展。內地媒體報道話，北京法院唔受理米高佐敦嘅控訴。不過米高佐敦都唔係「省油燈」，北京唔受理佢，就即刻轉移到上海「咬住唔放」，繼續控告。
北京法院唔受理呢單名義侵權案嘅理由係話，喬丹喺美國只係一個姓，有成千上萬嘅人都係姓喬丹，並無特別指定某個人，仲話米高佐敦喺中國就叫喬丹，但喺香港就叫佐敦，所以呢單起訴並唔成立。
有內地嘅律師就話，雖然喬丹體育喺舊年底已經通過咗中國證監會嘅審批，但仲未通過上交所嘅上市批准，加埋喺上個月中，有消費者向北京市海淀區人民法院提出起訴，話買咗喬丹品牌嘅衫，但宣傳入面並無講明呢啲產品同米高佐敦無關係，直斥對消費者造成誤導同埋欺詐。所以律師話背負住呢幾單潛在官司，隨時令到公司上市之路添上變數。
萬一呢單官司獲受理，以喬丹體育舊年嘅銷售收入接近30億元人民幣推算，米高佐敦嘅索償額可能會數以億元計，對公司嚟講都真係幾傷！