揸筷子難唔到佢
Joanna尋日同絲絲講，話佢老公平日送咗小朋友上校巴返學之後，就會自己去行山，落山時就啱啱好接阿仔放學。Joanna話佢兩個仔分別已經九歲同十三歲，都非常鍾意香港，仲好享受露營添，上個星期落雨都去咗幾日，結果返嚟嗰陣，個身發出陣陣異味，雖然即刻想畀個熊抱媽咪，都要畀人「的」去洗乾淨先。
其實Joanna一家真係已經融入晒香港生活，席間有人讚佢揸筷子揸得好，佢就回憶自己當年去上海食中菜，喺飯桌會轉嘅圓盤上用筷子夾餸，點知一出手啲餸就飛咗過對面，嚇到侍應即刻換番副刀叉畀佢，睇嚟佢依家餐桌嘅功力，都係經過一番苦練。