前幾日滙控（00005）第一次披露八個最高薪員工嘅薪酬，對住啲天文數字，絲絲啲同事個個睇到「嘩嘩」聲，謠傳捧走最高酬金713萬鎊（約8,800萬港元）嘅，係集團環球銀行及資本市場（俗稱炒房）行政總裁安思明（Samir Assaf）。
佢喺業績公布當日，套現咗超過38萬股滙控，以每股賣到5.552鎊計，安生總共套現咗約210萬鎊（約2,600萬港元），唔通佢覺得713萬鎊唔夠使？
絲絲追查之下，發現安生沽出嘅股份，係嚟自二○一○年公司嘅限制股份獎勵計劃，唔知係佢想揸多啲cash，定係已經揸咗太多滙控股份，所以減吓磅！
同安思明相反，滙豐亞太區行政總裁王冬勝，同埋零售銀行及財富管理業務行政總裁郭兆德就對公司信心十足喇！郭兆德賣咗四千幾股之後，即刻買番3.8萬幾股滙控。另一方面，王冬勝亦唔輸蝕，買咗約3.3萬股，可能佢見到亞太區盤數算幾靚，兼諗住支持吓公司啦。
另有外國小報流傳，集團行政總裁歐智華因為滙控兩單不當銷售嘅醜聞，畀公司沒收咗130萬鎊花紅，如果消息屬實，咪當買個教訓囉！