市場熱線：中電信勢衝5元關
第二輪長期再融資操作（LTRO）喺尋日收市後揭盅，達5,295億歐元，叫做多過預期，但消息公布後歐洲魚缸同美股期指反應唔大，但尋日亞洲魚缸已做好起跑準備，港股再升111點，除咗再創半年收市新高之外，亦逼近已經上移至21,779點嘅保力加通道頂部，如果破位之後，古勝會相繼調高埋止賺位。
亞洲魚缸淨得A股下跌，無非係睇好LTRO公布後有得炒，但市場點樣解讀則好難估，正如大笨象（00005）成績表有人讚有人彈一樣，理論上放水力度愈大愈會刺激通脹同資產價格。道指隔晚卒之升穿萬三點收市，同港股一樣打好底先升，尋日港股成交亦成個禮拜冇見過7字頭。
國策密密出掀炒風
尋日恒指亦唔係由頭升到尾，有兩段時間曾經輕微倒跌，但都好快趣反彈，大笨象亦重上70蚊。滬綜指8連升之後斷纜，內房同內險A股全線下跌，上海叫停二套房政策喺時間上幾令人愕然，但本港內房股算跌得少，仲有超過10隻中細價內房有得升，睇個款又係抖完氣再升格。
講到國策，喺兩會前夕密密出台，尋日大炒LED燈補貼政策，其實呢單嘢盛傳喺舊年尾推出，但拖到家陣，碰啱市況氣氛又好，燈膽股尋日靚爆燈。古勝自己就算有3成補貼都暫時冇興趣買LED燈，但當LED價格漸普及化就會出現最後贏家，除咗尋日炒起嗰3隻之後，仲有隻德普科技（03823）亦已轉型做LED燈。
另外，阿爺亦公布文化產業「十二五」規劃，之前已炒過兩次，所以班扮有文化股冇乜鑊氣。不過，阿爺要文化產業5年內升值1倍，的確係好有錢途，而焦點又放喺動漫同遊戲兩方面，但隻喜羊羊（00585）仲係懶洋洋，較為好樣係第一視頻（00082）。
呢兩日派完成績表嘅大隻佬，尋日全部倒跌，包括港交所（00388）、新地（00016）、新世界（00017）同信置（00083）等。彤叔宣布退休，佢嘅股一向難玩，好似新時代（00166）4日內由幾毫炒上兩蚊，但依家又得番一半。
賣「哎瘋」蝕頭賺尾
iPad 3盛傳喺下周三出世，一眾蘋果公司概念股又可埋位。兩日後中國電信（00728）亦正式賣CDMA版「哎瘋4S」，單嘢由流傳到成事已好多個月，大行報告亦好分歧，因為中電信初期要補貼手機開支又要增加宣傳開支，但所謂蝕頭賺尾，對公司長遠來講係好事，可吸收一批高端客戶。
花旗出過報告，話如果中電信每月可收到30萬個「哎瘋」用戶，就直情賺夠有凸。中電信亦因大行報告「彈弓手」，股價跌完又再升。如果確信對公司長遠有利，股價下跌其實唔怕趁低買，依家中電信股價只比舊年尾稍高幾個巴仙，所以當市場輪流炒落後嘅時候，中電信發威重上5蚊樓上亦大有可能。
古勝